久違咁打篇關於打風嘅文。
今次韋帕令到香港再次掛到十號風球,對於香港不少地區都做成不少破壞,係度再次感謝打風期間仍然要返工嘅各位工作人員,以及各位要善後嘅工作人員。
對於今次天文台早早係星期六早早已經講定星期日凌晨0020會出八號,固定兩小時出嘅Pre-8亦都準時係星期六晚2220發出,咁到底Pre-8係今次仲有咩意義?今次咁早講定掛八就得,上次超前部署嘅暴雨到頭來就一滴水都冇,今次上八之後去到星期日上午其實普遍地區個環境都唔算惡劣,天文台到底係唔係真係廢咗咁多?我自己叫做稍有興趣睇氣象數據同資料,唔算好熟悉,想分享自己對之前超前部署以及今次應對韋帕嘅睇法。
首先,按時序咁講,係上次應對暴雨嘅超前部署。暴雨嚟講,本身其實就好難準確預計,技術上嚟講幾個鐘後有冇暴雨其實都唔易準確預計到。拉闊啲咁講,唔好話暴雨,其實會唔會落雨都唔易預計得到。以好多人認為好準嘅日本氣象廳(JMA)做例子,日本氣象廳基本上係每日預報都會有降雨機率,做法係參考之前嘅天氣圖等紀錄,係以前有類似現時預計嘅天氣表象嘅時候,用100次有幾多次真係有一定雨量,將之簡化為一個數字就稱之為降雨機率,但實際出嚟,高達70降雨機率嘅情況,一樣可以冇雨落,因為其實以前都有30次係冇雨落㗎。而7月11日呢日被超前部署嘅日子,果一日朝早其實福建至廣東嘅東南沿岸都係落好大雨(有興趣嘅朋友可以自己去睇返中國氣象局CMA嘅資料),以香港咁細嘅地點嚟講,其實會唔會受到呢個雨區影響,真係好難預計得準確。
另一方面,天文台係冇權做任何停課等等嘅超前部署安排嘅,天文台只係能夠數據同分析俾司長、局長,停課與否係由教育局決定,就算八號風球都係。司長認為已經入咗暑假,為安全着想有額外考慮決定超前部署,咁停唔停課呢啲又真係已經唔關天文台事。
-----------------------------------------------------------------------------------------------------------------------
同樣地,今次韋帕襲港,由於係星期日的關係,天文台有冇因此而鬆手咗提早掛波呢?如果根據相關風球嘅定義,本身熱帶氣旋警告就有預警嘅成份,預料本港將於受到相關強風嘅影響就可以出,係定義上係無話可說嘅,而實際上大家經歷完之後都睇到,韋帕嘅威力係足夠強勁嘅。再者韋帕今次環流唔算大,結構相對完整,而且前進速度穩定,加上會以對香港影響較大嘅南掠路線吹襲,天文台係有足夠時間同數據去判斷到韋帕嘅烈風圈、暴風圈大約幾時真係會影響到香港嘅情況下,提早通知市民讓市民提高警覺其實無可厚非。
不過我都認為今次太早係有星期日以及司長早前「超前部署」嘅因素在內。但即使係咁,我認為今次天文台早早講定0020會出八號,等市民可以唔洗早起身睇吓星期日洗唔洗返工,或讓市民提早一日對其他節目作出安排,其實唔見得係咩壞事。
星期六、星期日凌晨甚至早上,網絡上都仲有唔少人都講緊個八/九/十號好弱等等,的確如果經常出現「弱八」係會有狼來了嘅效果,但希望大家明白,每一個風暴嘅路線、強度、結構都唔同,幾時會係有大影響其實冇得話一定,早啲掛總好過遲咗掛出意外。好似今次咁,因為係近距離南掠加上環流唔算大嘅關係,基本上係韋帕開始離開香港,佢嘅風雨先開始真係影響香港大部份地區,再加上香港本身山多,吹唔同風向嘅風已經會對唔同地區帶嚟唔同實際上嘅感覺,你果區冇事果陣,其實可能另一區已經橫風橫雨水浸緊。
我明白唔會所有人都對氣象知識有興趣睇好多嘢,但希望大家都能夠有基本認知。此外,以颱風相關嘅資訊嚟講,只要個風入咗南海的話,香港天文台(HKO)比起普遍追風會睇嘅日本氣象廳(JMA)、中國氣象局(CMA)、聯合颱風警報中心(JTWC)等觀察西太平洋嘅氣象機構嚟講,多年來都係咁多個當中較為準確嘅一個,風迷之間會稱天文台為「南海之王」並唔係取笑嘅稱呼嚟。